ЩытыкIэр зыхуэдэр тлъэгъуащ, жаIэр зэхэтхащ
- ЗэIущIэр ирегъэкIуэкI КъБР-м и Правительствэм и УнафэщIым и къуэдзэ Ерчэн Темболэт
ЗэIущIэр къызэIуихащ икIи иригъэкIуэкIащ КъБР-м и Правительствэм и УнафэщIым и къуэдзэ Ерчэн Темболэт. Япэу псалъэ зрата, Дунейпсо Адыгэ Хасэм и тхьэмадэ, Сирием щыIа гупым хэта Ажахъуэ Къанщобий кIэщIу тепсэлъыхьыжащ правительствэ комиссэм и унафэм ипкъ иткIэ, УФ-м икIа лIыкIуэхэр Сирием зэрыщыIам, щытыкIэ гугъу къихута ди лъэпкъэгъухэм Дамаск зэращыхуэзам.
— ЦIыхуи 9 дыхъуу УФ-м къыбгъэдэкI лIыкIуэхэр Сирие Хьэрып Республикэм дыкIуащ, абыкIэ зэгурыIуат урысей парламентымрэ СХьР-м и Iэтащхьэхэмрэ. Адыгэхэм дащыхуэзащ УФ-м и посольствэу Сирием щыIэм, а къэралым щылажьэ Адыгэ ФIыщIэ Хасэхэм, – жиIащ Ажахъуэм. – МахуитIым къриубыдэу дэ лэжьыгъэшхуэ едгъэкIуэкIащ, Урысейм и посолу СХьР-м щыIэм дыIущIащ, бэлыхь хэхуа ди къуэшхэм дахуэзащ. Ди къалэн нэхъыщхьэу щытар Сирием щыщыIэ политикэ щытыкIэр, хэхэс адыгэхэр зыхэт гугъуехьыр зэдгъэщIэныр арати, дызытекIухьар зэдгъэлъэгъуащ, ди лъэпкъэгъухэм жаIэр зэхэтхащ. Адыгэхэр, шэч хэмылъу, къэралым къыщыхъуа зэрыхьзэрийм егъэгузавэ, ауэ, куэду, зэгъэуIуауэ хэкум къэкIуэжын Iуэху зэкIэ зэрахуэркъым.
Ди лъэпкъэгъухэм я гурыгъу нэхъыщхьэр дэфтэр Iуэхухэр кIыхьлIыхьу фIэкIа зэрызэфIэмыкIырщ. Абыхэм къэралитIми я цIыхуу зэрыщытымкIэ дэфтэр къыдахыну я хъуэпсапIэщ, зэрыс щIыналъэм шынагъуэ къыщыхъу хъужыкъуэмэ, адэжь лъахэм гугъуехьыншэу къихьэжыфын щхьэкIэ. Сирием дызэрыщылэжьам къыпэкIуа IуэхуфIхэм ящыщщ абы щыпсэу адыгэхэмрэ Урысей посольствэу а къэралым щыIэмрэ нэхъ гъунэгъу зэрызэхуэтщIар.
Ажахъуэм къыхигъэщащ ялъэгъуахэмрэ зэхахахэмрэ зэрыт дэфтэрыр зэхалъхьэу УФ-м и Федеральнэ Зэхуэсым ФедерацэмкIэ и Советым и пащхьэ зэман гъунэгъум къриубыдэу иралъхьэжыну, итIанэ абы ипкъ иткIэ, ди лъэпкъэгъухэм зэрадэIэпыкъун Iэмалхэр Хамэ къэрал IуэхухэмкIэ министерствэмрэ Iэпхъуэшапхъуэхэм я IуэхухэмкIэ Федеральнэ къулыкъущIапIэмрэ я пащхьэ иралъхьэнущ.
АдэкIэ псалъэ зрата, КъБР-м Жылагъуэ, дин зэгухьэныгъэхэм я IуэхухэмкIэ и къэрал комитетым и унафэщI Пащты Борис жиIащ комиссэм иригъэкIуэкI лэжьыгъэхэр КъБР-м и Iэтащхьэм и нэIэ зэрыщIэтыр. Комиссэм къиIэта Iуэхум ипкъ иткIэ, Сирием къыщыхъуа зэрыхьзэрийм ди лъэпкъэгъухэм къатрилъхьэ бэлыхьыр зэгъэщIэным, ядэIэпыкъуным теухуа Iуэхур зэрыкIуатэр Ажахъуэм и къэпсэлъэныгъэм къызэрыхэщар жиIащ Пащты Борис.
А Iуэхум и ужь ит лэжьакIуэ гупым КъБР-м и Правительствэм зыхуагъэзащ хамэ къэрал щыпсэу ди лъэпкъэгъухэу адэжь лъахэм къакIуэхэмрэ хэкур псэупIэ зыхуэхъужахэмрэ ядэлажьэ центрыр зыхэтыну IуэхущIапIэр убзыхунымкIэ дэIэпыкъуэгъу къахуэхъуну. Абы екIуэлIэнур адыгэхэм я закъуэкъым, атIэ нэгъуэщI лъэпкъхэм къахэкIауэ КъБР-м къэзыгъэзэж псоми щадэIэпыкъунущ.
Пащты Борис къыхигъэщахэм ящыщщ хамэ къэрал щыпсэу ди лъэпкъэгъухэм яхудиIэ пыщIэныгъэхэр 2012 – 2015 гъэхэм егъэфIэкIуэным хуэунэтIауэ зэхалъхьа проектым КъБР-м и Правительствэр хэплъэну зэрыхуагъэхьар. Апхуэдэуи комиссэм хэтхэр блэкIа мазитIым яхуэзащ ди лъэпкъэгъу хэхэсхэм я щIэблэу КъБКъУ-м, КъБКъМА-м щеджэхэм.
— Сирием щыщу ди лъахэм щеджэ студент 26-м ахъшэкIэ дадэIэпыкъуащ, – пищащ адэкIэ Пащтым. – Гъатхэпэм и 1-м къызэрытпщытамкIэ, еджакIуэ 88-р дяпэкIи ди дэIэпыкъуныгъэ хуэныкъуэщ. СХьР-м щекIуэкI зэрыхьзэрийм зи щхьэр къыхэзыха ди лъэпкъэгъухэр щыпсэун папщIэ, КъБР-м и Iэтащхьэм «Дружба» санаторэр яхухихащ. Иджыпсту абы цIыхуи 9 къудей щIэсу аращ, зыбжанэ «Нартым» щопсэу. Абыхэм зэрызащIэдгъакъуэ ахъшэр зэкIэ къызыхэкIыр уней мылъкущ. ДяпэкIэ, гъэмахуэм, гъэ къэси хуэдэу, ди лъэпкъэгъухэм я щIэблэр хэкум къедгъэблэгъэнущ. Ар зэтеублауэ зэрекIуэкIым псори фыщыгъуазэщ. Мыбы теухуауэ къыддэлажьэхэм фIыщIэ яхудощI, ялъэкI къамыгъанэу ди Iуэхур зэрагъэкIуатэм папщIэ.
ЗэIущIэм хэтхэм я упщIэхэм жэуап щритым Пащты Борис жиIащ «Дружба» санаторэм щIэсхэм трагъэкIуадэ ахъшэр КъБР-м и Iэтащхьэ Къанокъуэ Арсен къазэрыритар; Хэкум къэзыгъэзэжхэм щадэIэпыкъуну центрым папщIэ сом мелуани 5 республикэ бюджетым къыхагъэкIыну зэрамурадыр.
НэщIэпыджэ Замирэ